سنڌ ۾ ڪارپوريٽ فارمنگ جي نالي تي سنڌ جي ھزارين ايڪڙ زمين مختلف ڪمپنين حوالي ڪرڻ کانپوءِ سنڌ حڪومت ھاڻي ڄامشورو ۽ مٽياري ضلعن جي ٻيلي کاتي جي زمين به مختلف ڪمپنين کي ڏيڻ جو منصوبو جوڙي ڇڏيو آھي.
ان حوالي سان مليل ڄاڻ موجب مٽياري ۽ ڄامشورو ضلعي جي 18 ٻيلن جون 86 هزار 400 ايڪڙ زمينون خانگي ڪمپنين کي 44 سالن لاء ليز تي الاٽ ڪرڻ جون تياريون آخري مرحلي ۾ داخل ٿي ويون آهن ٻيلي کاتي جي ذريعن موجب 18 ٻيلن جي ليز حاصل ڪرڻ لاء 11 آڇون جمع ڪرايون ويون آهن پيڪيج هڪ ۾ سعيدآباد جا بٺو،ڪيلي بٺو،راڻو،نور ڪييٽي ،نورل آباد ،ڪاري ٻيلو،رشال،پڪو ڀاڻوٺ،ڪچو ڀاڻوٺ ۽ ڄامشورو جو مانجهند ٻيلو شامل آهن ان لاءِ 4 آڇون جمع ڪرايون ويون آهن پيڪيج 2 ۾ هالا شامل آهي جنهن جي ڪچو خانوٺ،پڪو خانوٺ،سالارو هڪ ،سالارو ٻه ،رئيس مريد،خيبراڻي۽ ڄامشورو ضلعي جو راڄڙي ٻيلو شامل آهن ان لاءِ 3 آڇون جمع ٿيون آهن پيڪيج 3 ۾ مٽياري شامل ڪيو ويو آهي هن ۾ مٽياري ۽ ڄامشورو ضلعي جو انڙ پور ٻيلو شامل آهن انهن لاء به 4 آڇون جمع ڪرايون ويون آهن خانگي ڪمپنين في آڇ سان گڏ 10ڪروڙ رپين جي بئنڪ گارنٽي پڻ جمع ڪرائي آهي.
ذريعن موجب فني ڪميٽي 26 مئي تي آڇن جو جائزو پڻ مڪمل ڪري ورتو آهي ٽن هفتن اندر ٻيلي کاتي جون زمينون ليز تي الاٽ ڪرڻ جو ڪم مڪمل ڪيو ويندو. پي ٽي آئي جي اڳوڻي ايم اين اي لال مالھي رابطي ڪرڻ تي چيو ته پاڪستان پيپلز پارٽي اقتدار خاطر سنڌ جو سودو ڪرڻ کان نه ڪيٻايو آھي، چاھي پوءِ اھو ٻٽو نظام ھجي يا پوءِ صدارتي ھائوس ۾ ويھي چولستان سميت 6 ڪئنالن جي منظوري ھجي يا ڪارپوريٽ فارمنگ ھجي. ھن وڌيڪ چيو ته ڪارپوريٽ فارمنگ جي نالي تي سنڌ جي لکين ايڪڙ زمين مختلف ڪمپنين کي ڏيڻ جو فيصلو ڪيو ويو آھي، جنھن کي پي ٽي آئي ۽ اسان رد ڪريون ٿا، ڪارپوريٽ فارمنگ جي نالي تي ڏنل زمين تي صرف سنڌ جي ھارين جو جو حق آھي، جيڪي صدين کان اتي آباد آھن، سنڌ جون زمينون انھن ھارين حوالي ڪري وسيلا فراهم ڪيا وڃن جئين اھي زمينون آباد ڪري سگھن.
لال مالهي جو چوڻ هو ته سنڌ جي زمينن تي والار ۽ قبضي جو آھستي آھستي نظام ٺاھيو پيو وڃي، ان ۾ پ پ شامل آھي، ڪارپوريٽ فارمنگ جي نالي تي جيڪا زمين مختلف ڪمپنين حوالي ڪئي وئي آھي، ان کي سنڌ حڪومت ڪنھن به وقت رد ڪرڻ جو اختيار رکي ٿي پر اڃا تائين ان کي رد نه ڪيو آھي ۽ نه ئي وري چولستان سميت 6 ڪئنالن کي رد ڪيو ويو آھي، پ پ اقتدار ۾ رهڻ لاءِ جيڪي ڪوششون ڪيون آھن، اھي سنڌ لاءِ ھاڃيڪار آھن، صدر زرداري چاھي ٿو ته سندس پٽ بلاول ڀٽو زرداري ملڪ جو وزيراعظم ٿئي، پر اھو ووٽ جي ذريعي وزيراعظم ٿئي ممڪن ناھي. تازو سنڀڙيال اليڪشن ٿي آھي، ان ۾ پ پ اميدوار مشڪل سان ٽي کان چار ھزار ووٽ کنيا آھن، اھڙي صورتحال پ پ جي ملڪ جي ٻين صوبن م به آھي، پر پ پ اقتدار ۾ رھڻ لاءِ سنڌ جو سودو ڪري رھي آھي.
ٻئي طرف جيئي سنڌ قومي محاذ جي سرواڻ ڊاڪٽر نياز ڪالاڻي رابطي ڪرڻ تي چيو ته اسان سنڌ جي ٻيلي کاتي جون زمينون مختلف ڪمپنين کي ڏيڻ به ڪارپوريٽ فارمنگ جو حصو سمجھون ٿا، جن جن ضلعن ۾ ٻيلي کاتي جون زمينون مختلف ڪمپنين کي ڏنيون وينديون، اسان انھن اختيارين خلاف سندن آفيسن آڏو ريليون ڪڍي احتجاج ڪنداسون.
