سنجهوري ويجهو ديھ 13 جمڙائو ۾ بيدردي سان قتل ڪيل 20 سالن جي نوجوان ناري عظيـمان بگٽي جي قتل جي ايف آئي آر سرڪاري مدعيت ۾ 7 ڄاتل ۽ ڪجھ نامعلوم جوابدارن خلاف کڏڙو ٿاڻي تي داخل ڪئي آهي.
ايف آئي آر مقتول ناري جي مڙس عمر بگٽي , دوست علي بگٽي , شاھ ڏنو بگٽي , حضور بخش بگٽي ,سڄڻ بگٽي , شهمير بگٽي ۽ واحد بخش بگٽي سميت 7 ڄاتل ۽ ڪجھ نامعلوم ماڻهن تي قلم 302 , 201 , 311 ۽ دهشتگردي جي قلم 7 اي ٽي اي تحت داخل ڪئي وئي.
ايف آئي آر ۾ ڄاڻايو ويو آهي ته مقتول ناري عظيمان بگٽي پنهنجي مڙس جي گهران نڪري وڃڻ تي سندس مڙس عمر ولد لعل بخش بگٽي مٿس ڪارنهن جو الزام هڻي پنهنجي ڀائرن ۽ مائٽن سان گڏ ناري عظيمان جي جسم جي ڇاتي کان مٿئين حصي ٻانهون، منڍي ڪنهن تيز ڌار اوزار سان ڪٽي سندس منهن جي چمڙي لاهي عورت کي بيدردي سان ماري سندس لاش سرنهن جي فصل ۾ لڪائي اڇلي تذليل ڪئي ۽ علائقي ۾ خوف ۽ ڏهڪاء پکيڙيو.
