حيدرآباد: حيدرآباد ۾ بيدردي سان قتل ٿيل شاعر آڪاش انصاري جي قتل واقعي ۾ اھم شاھديون ھٿ،  ايس ايس پي جو جاچ ٽيم ۽ پوسٽ مارٽم ڪندڙ ڊاڪٽرن سان گڏجي واقعي واري هنڌ جو دورو، پوليس جاچ ۾ جوابدار پٽ لطيف آڪاش ڏوھ جو اعتراف ڪري ورتو، مقتول جي وارثن جا ڪيس داخل ڪرائڻ لاءِ وڪيلن سان مشورا، آڪاش جي پوسٽ مارٽم رپورٽ اڄ(سومر) پڌري ٿيندي.

تفصيل موجب حيدرآباد جي سٽيزن ڪالوني ۾ گھر اندر بيدردي سان قتل ٿيل انقلابي ۽ مزاحمتي شاعر آڪاش انصاري جي قتل جو ڪيس ٻه ڏينھن گذرڻ باوجود رات تائين داخل نه ٿي سگھيو آھي. جڏھن ته واقعي جي جاچ لاءِ ايس ايس پي ڊاڪٽر فرخ لنجار پوسٽ مارٽم ڪندڙ ڊاڪٽرن ۽ جاچ ٽيم سان گڏجي واقعي واري ھنڌ جو جائزو ورتو.

ٻئي طرف ايس پي ھيڊ ڪوارٽر مسعود اقبال جي اڳواڻي ۾ جوڙيل جاچ ڪميٽي آڪاش انصاري جي گھر پھچي شاھديون ھٿ ڪيون. جڏھن ته آڪاش انصاري جي تدفين واري ھنڌ وٽان پوليس پاران حراست ۾ ورتل ڊاڪٽر آڪاش جي پٽ لطيف آڪاش ۽ ڊرائيور کي سي آئي اي سينٽر حيدرآباد منتقل ڪيو ويو. ان حوالي سان پوليس جي اهم ذريعن ڊاڪٽر آڪاش انصاري جي قتل ۾ سندس هنج ورتل پٽ جي ملوث هئڻ جي تصديق ڪري ڇڏي آھي. وشال لطيف جو پير باه ۾ نه پر هن پاڻي سان ساڙي ڊارمو ڪيو.

وشال رات جو چئين بجي کانپوء دوستن سان ملڻ ويو ته سندس پير کي رت لڳل هو ۽ هن دوستن کي ٻڌايو ته بائيڪ تان ڪريو آهي. صبح جو اٺين بجي کانپوء وشال ڊرائيور کي ننڊ مان اٿاريو ته بابا جي ڪمري ۾ باه لڳل آهي. ڊاڪٽر آڪاش جي جسم تي چاقن جا زخم هئا شيشي جا نه هئا. ڊرائيور اعتراف ڪيو ته وشال لطيف قتل ڪيو آهي. وشال لطيف به گرفتاري وقت اعتراف ڪيو ته هن پئسن جي لالچ ۾ اچي غلطي ڪئي پر بعد ۾ وري بيان تان ڦري ويو.

پوليس ذريعن جو وڌيڪ چوڻ آھي ته ڪيس ۾ لطيف آڪاش جي ٻن دوستن کي جن سان لطيف واقعي واري رات کان ٻئي ڏينھن تائين رابطي ۾ ھو، انھن کي پڻ حراست ۾ ورتو آهي، جن کان پڇا ڳاڇا ڪئي آھي. ٻئي پاسي ايس ايس پي حيدرآباد ڊاڪٽر فرخ لنجار رابطو ڪرڻ تي ٻڌايو ته ڊاڪٽر آڪاش جي قتل ۾ شڪ جي بنياد تي گرفتار سندس هنج ورتل پٽ جي ملوث هئڻ جا شڪ مضبوط آهن، صرف پوسٽ مارٽم ۽ فارنزڪ رپورٽ جو انتظار آهي. ھوڏانھن مقتول آڪاش انصاري جا وارث قتل ڪيس داخل ڪرائڻ لاءِ وڪيلن سان مشورا ڪري رھيا آھن، جنھن سبب ھينئر تائين قتل ڪيس داخل نه ٿي سگھيو آھي. جڏھن ته ڊاڪٽرن پاران اڄ پوسٽ مارٽم رپورٽ جاري ڪئي ويندي.