حيدرآباد: ڏينھن اڳ لاھور جي واھگا بارڊر تان کنڀيل ميرپورخاص واسي نوجوان اوم پرڪاش جو پتو نه پئجي سگھيو آهي. ڀارت ياترا تي ويل گهرڀاتين جي حالت خراب، ھا۽ ڪورٽ ۾ پٽيشن داخل ڪئي وئي آهي.

رپورٽ موجب لاھور جي واھگا بارڊر جي اميگريشن واري ھنڌ تان کنڀيل ميرپورخاص واسي نوجوان اوم پرڪاش جو 6 ڏينھن گذرڻ باوجود پتو نه پئجي سگھيو. ان حوالي سان نوجوان اوم پرڪاش جي ڀيڻ ڊاڪٽر نرملا  دي رائيز نيوز کي ٻڌايو ته اسان جا گهرڀاتي مھا ڪنڀ جي ميلي ۾ مذھبي ياترا ۽ پوڄا پاٺ لاء 6 ڏينھن اڳ واھگا بارڊر ذريعي ڀارت وڃي رھيا هئا (جنھن ۾ منھنجو پيءُ، ماءُ، ڀاءُ، ٻن ڀينرن، ڏاڏي ۽ ڀاڻيجو شامل هئا) ته اوچتو 10 کان وڌيڪ سادا ڪپڙا پاتل ماڻھن منھنجي ڀاءُ اوم پرڪاش کان پاسپورٽ ۽ موبائيل فون ورتو ۽ کيس زوري پاڻ سان گڏ وٺي وڃي رھيا هئا ته مون کين چيو ته توھان منھنجي ڀاءُ کي ائين ڪيئن وٺي وڃي رھيا آهيو، جنھن کانپوءِ ھنن مون کان موبائيل فون کسي ورتو ۽ ڌمڪي واري انداز ۾ چيو ته توکي به گڏ وٿي وينداسين.

ھن لڙڪ لاڙيندي ٻڌايو ته 11 ھين وڳي کان شام جو 6 وڳي تائين هوءَ اميگريشن جي آفيس ۾ ڀاءُ جي اچڻ جي پڇا ڪندي رهي پر ڪنھن بہ هِن کي جواب نه ڏنو. اميگريشن تان ويندڙ منھنجي گهرڀاتين به احتجاج ڪيو پر ان جو به ڪو فائدو نه ٿيو، مون پنھنجي گھر ڀاتين کي آٿت ڏيندي ياترا تي موڪليو ته ڀاءُ به توھان جي پويان اچي ويندو، پريشان نه ٿيو.

جڏھن ته 6 ڏينھن گذرڻ باوجود ڀاءُ جي بازياب نه ٿيڻ تي ڀارت ياترا تي ويل منھنجي ماءُ پنھنجي جوان پٽ جي وڇوڙي جي صدمي ۾ بيمار ٿي پئي آهي. ڊاڪٽر نرملا ٻڌايو ته ڀاءُ جي کنڀجڻ کانپوءِ اسان پوليس سان رابطو ڪيو پر ھنن اسان جي ھڪ به نه ٻڌي، منھنجو ڀاءُ ڊبليو ايڇ او ۾ ڪم ڪندو ھو، جنھن کانپوءِ هن پيڊي کولي پنھنجو ڪاروبار شروع ڪيو ھو، منھنجي ڀاءُ ڪنھن بہ غيرقانوني سرگرمين ۾ ملوث ناھي، ھو ته صفا سادو سودو آهي.

 اسان کي خبر ناھي ته ڇو ھِن بيگناهه کي کنڀيو ويو آهي، ڀاءُ جي کنڀجڻ کانپوءِ ننڊ به نه ڪري سگھي آهيان، مون پنھنجي ڀاءُ جي بازيابي لاءِ سنڌ هاءِ ڪورٽ ۾ پٽيشن داخل ڪئي آهي، جڏھن ته پنجاب پوليس کي پورٽل ذريعي ڏنل درخواست جو به اڃا تائين ڪو به جواب نه مليو آهي. جنھن ڪري وڌيڪ پريشاني جو شڪار آهيان ٻئي طرف ايڇ آر سي پي سنڌ جي صدر قاضي خضر رابطو ڪرڻ تي ٻڌايو ته نوجوان اوم پرڪاش کي واھگا بارڊر تان کنڀڻ جي سخت لفظن م مذمت ڪريون ٿا، ھي انساني حقن جي قانون جي ڀڃڪڙي آهي، اسان نوجوان جي بازيابي تائين متاثر ڌر سان گڏ ھونداسين. ھوڏانھن دراوڙ اتحاد جي سربراهه شيوا ڪڇي ٻڌايو ته نوجوان اوم پرڪاش کي کنڀڻ انساني حقن جي لتاڙ آهي، هو متاثر ڌر سان رابطي ۾ آهي ، ان حوالي سان ھا۽ ڪورٽ ۾ پٽيشن به داخل ڪئي وئي آهي.

 اميد ته نوجوان اوم پرڪاش خيريت سان واپس موٽي ايندو، ھن واقعي کان اڳ به اوم پرڪاش جي ڀيڻيويئي کي به کنڀيو ويو ھو پر ٻن ڪلاڪن کان پوءِ کيس آزاد ڪيو ويو ھو.