حيدرآباد : رپورٽ موجب لاھور جي واھگا بارڊر جي اميگريشن واري ھنڌ تان کنڀيل ميرپورخاص واسي نوجوان اوم پرڪاش جو 8 ڏينھن گذرڻ باوجود پتو نه پئجي سگھيو آهي، جنھن سبب ميرپورخاص ۾ موجود سندس ڀيڻ ڊاڪٽر نرملا اعلي اختيارين جي درن جا ڌڪا کائڻ تي مجبور بڻيل آهي.
جڏھن ته ڊاڪٽر نرملا پنھنجي مڙس سان گڏجي ايڇ آر سي پي جي آفيس ڪراچي پھتي، جتي ھن ايڇ آرسي پي جي چيئرپرسن اسد بٽ ۽ سنڌ جي صدر قاضي خضر سان ملاقات ڪندي ٻڌايو ته منھنجو ڀاءُ اوم پرڪاش گهرڀاتين سان گڏجي ڀارت ياترا تي وڃي رھيو ھو ته 8 کان وڌيڪ سادن ڪپڙن ۾ ملبوس ماڻھن اميگريشن واري ھنڌ تان منھنجي ڀاءُ کي زوري کڻي ويا، جنھن تي مون احتجاج ڪيو ته مون کان به موبائيل فون ڦريو ويو، جنھن کان پوءِ پنجاب پوليس منھنجي ھڪ به نه ٻڌي ۽ اتان 8 ڪلاڪ انتظار ڪرڻ کان پوءِ نااميد ٿي واپس ميرپورخاص پھتس، جتي مون پنھنجي ڀاءُ جي بازيابي لاءِ سنڌ هائي ڪورٽ ۾ پٽيشن داخل ڪئي آهي، جنھن ۾ آئي جي پنجاب، ڊي آئي جي، ايس ايس پي لاھور ۽ اميگريشن انتظاميا کي ڌر بڻايو آهي. .
نرملا ٻڌايو ته هوءَ مسلسل پنهنجي ڀاءُ کي واٽس اپ تي ميسيج ڪري رهي آهي جيئن چيڪ به ٿي رهيا آهن پر ڪو جواب نه ٿو ڏنو وڃي. ھن وڌيڪ ٻڌايو ته منھنجي ڀاءُ تي ڪو به ڪيس داخل ناھي ۽ نه ئي هو ڪنھن قومپرست تنظيم سان لاڳاپيل آهي، اسان ھتان جا پرامن شھري آهيون اسان کي بناجواز تنگ ڪيو پيو وڃي، اسان جي اعلي اختيارين کان گھر آهي ته ڀاءُ اوم پرڪاش کي آزاد ڪيو وڃي، ڀارت ياترا تي ويل منھنجي ماءُ، پيءُ، ڏاڏي ۽ ڀيڻ جي حالت به خراب آهي، انھن روئي روئي اکين جو نور وڃائي ڇڏيو آهي.
ھن ٻڌايو ته ڀاءُ کي کنڀڻ خلاف اسان گڏيل قومن جي اداري کي به درخواست ڏينداسين، جيئن ڀاءُ جلد آزاد ٿي سگھي. ٻئي طرف ايڇ آر سي پي جي چيئر اسد بٽ چيو آهي تہ پرامن شھري کي کنڀڻ انساني حقن جي لتاڙ آهي، اسان نوجوان اوم پرڪاش جي بازيابي لاءِ پنجاب پوليس ۽ اعلي اختيارين سان ڳالهائينداسين ته جيئن نوجوان باحفاظت واپس موٽي سگھي.
