ڪنري: ڪنري مان 13 سالن جي نابالغ هندو نينگري اغوا ڪرڻ کانپوءِ مذهب تبديل ۽ شادي ڪرائي ڇڏي.
ڏيڍ مھينو اڳ شھر جي جوزف آباد پاڙي مان مبينا اغوا ڄاڻايل 13 سالن جي نينگري ناجو ڌيءَ آسن ڪولهي اغوا ٿي هئي. نينگري جي والد آسن ڪولهي جي فرياد تي چئن ڄڻن علي گشڪوري، لالو، مھراڻ ۽ گلاب گشڪوري خلاف ڏيڍ مھيني بعد ڪنري ٿاڻي تي چائلڊ ميريج ايڪٽ تحت ڪيس داخل ڪرائي ڇڏيو آهي.
نينگري جي والد آسن ڪولهي، دي رائيز نيوز سان ڳالهائيندي چيو ته جوابدارن 6 فيبروري رات جو هن جي گهر ۾ گھڙي هٿيارن جي زور تي نابالغ نياڻي ناجو کي اغوا ڪري کڻي ويا.
ٻئي ڏينهن تي پوليس ٿاڻي تي وڃي ڪيس داخل ڪرائڻ لاءِ ويس پر پوليس اهو چئي ڪيس داخل ڪرڻ کان انڪار ڪيو ته نينگري جو مذهب تبديل ٿي چڪو آهي هاڻي ان جي شادي به ٿي وئي آهي ان ڪري ڪجهه به نه ٿو ٿي سگهي.
هن وڌيڪ ٻڌايو ته هو تڪ جي ماڻهن سان مسلسل رابطو ڪندو رهيو ۽ انهن واعدا ڪيا ته نينگري کي جلدي ۾ واپس ڪرائيندا پر هن وقت تائين هن جي ڌيءَ واپس ناهي ٿي.
ڪيس 40 ڏينهن بعد داخل
پوليس ڏيڍ مهيني بعد ڪنري ٿاڻي تي چائلڊ ميريج ايڪٽ تحت ڪيس داخل ڪيو آهي. منھنجي نابالغ ڌيءَ جو ننڍي ڄمار ۾ نڪاح ڪرائي ڇڏيو آھي، نياڻي جي پيدائشي سرٽيفيڪٽ ۽ اسڪول جا سرٽيفيڪٽ موجود آھن، نياڻي ننڍي آھي، انصاف ڪيو وڃي.
چائلڊ پروٽيڪشن آفيسر ممتاز ڀٽي پاران به نينگري جي عمر ننڍي هجڻ جي تصديق ڪئي آهي. پوليس ڪاروائي ڪندي ڪيس ۾ نامزد ھڪ ڄڻي علي گشڪوري کي گرفتار ڪري ورتو.
